دبابيس الخميس: كلمنجي وكلمنجو

 

كلمنجي وكلمنجو

راح الكلمنجي عالفسخاني
يبيع كلماته في الكراريس
قاللو بنص بريزة وتبقى مسقف
فرصة عظيمة وسعر رخيص
قاللوا معلم موزة: بضاعتك
زفرة تاخدها لبتوع الجرانين
بشوية ملح وصلصة وإرفة
يبيعوا كلامْجَك للأراطيس
...
حَب الكلمنجي يجرب تاني
لَمّ كلامه وعالفكهاني وراح:
بنص ريال وتشيل فُكاهات
وكلام عن أرع كتير ونياح
الريس عِنبَة ادّاللو نصيحة
من طيبتو وقاللوا كلامك بايت
روح لبتوع السيما .. بَابُودمّو
ومزيكة يتحول أمجاد وكفاح
...
عدَّا الكلمنجي يا عيني يجرجر
شيلته فريح شباك حلاق
فدخللو وقاللو: معايا اللي يسلي
زبونك  وتمللي يعودلك مشتاق
قال من غير ما يبص الأسطى:
كلامك بارد ينفع ف التليفزيون
دا كلامْجَك مع بودرة وتسريحة
يطلّع كتكوتة بترطُن ف الأخلاق
..
الكلمنجي فكر يتمدِّن فاتعولم
لبس الكسكِّتة و راح ع َصايبر
قال: بشوية كاش ودورين ببلاش
هاكتبلك موقع بيبرجل  ويِحير
قاللو الأدمِن: "أوهام!" بس رموزك
تنفع حزب مكنسل م الزعامات
بفلاحتك على كام برنامج حزبي
بالفلاشات وفتوات، هيهَيِّس ويزمَّر
..
والكلمنجي يوماتي يجرب حظُه
مرة في شُبرا ومرة ف بندر طنطا
لا هُوُ طايل شُهرة ولا نايبُه
حِتة خَرطة منِ التورتة
وتمللي هيطلع م المولد
بلا حُمُّص حتماً على طول
وهيفضل صاحب مبدأ بيقول
على لونَك دايماً يا باتيستا