أجازة الناس
وقتها معروف
دايماً في الصيف
مش وقت امطار
ولا جو خريف
أو شهر غيوم
ليل ونهار
لكن في أغسطس
في البحر تعوم
زي الحريف
أو شهر تموز
تركب مركب
تعمل بحّار
أما في سبتمبر
فدا شهر وداع
للطقس الحار
آخر ما نشوف
أمواج وبحار
ووراه أكتوبر
أيامنا بتقصر
ونولع
من بدري الأنوار
وف نص نوفمبر
المنجة بتخلص
والنخل يبوح
بالأسرار
هو انت يا صيف
لساتك في الدار
طوِّلت شوية
يا بو ضل خفيف
وأجازتك إمتى
انا عقلي احتار
يا ضيف يا ظريف
يا منور قعدتنا
بالشمس قوية
إطلع لك رحلة
أو شوف لك مشوار
سيب لنا شهرين
بشوية برد
وجو لطيف
نشرب فيه شوربة
ونحط أبو فروة
على النار
__
علاء زين الدين
نوفمبر ٢٠١٩
