يا مصر أنا باحلم
يا مصر هواكي في دمي ومنك لوني
من حبي يا حلوة هبوحلك بِشْجوني
باشتاقلك في البعد تَمَللي وباحلم بايامك
دي صورتك فالقلب يا مصر وفِعْيُوني
ع الشَّط كَبَرت مابِين رَمْلِك وسَماكي
من بَحَري لأسوان كان يِحْلا الجَو معاكي
يِصحا نهارك بأدان وتْخَبَّط على بابُهْ الأفران
أصواتك فِ الفكر تعَشِّش ولا أمْلك أنساكي
الكروان فِ الشاطبي يغني بلحن حزين
عَ الجيزة يطير ويحُط فْ عين السلليين
من غير حاجز بيرفرف ويحلَّق فِ هَواكي
ويَمامِك مشدود للأرض بيِكتم فِ حَنِين
الحُب يا بلدي وأشواقي متمنعنيش
بِالْهَمّ أصارحك واكْشِفْلِك ولاخَبِّيش
أحوالك ما تسُرّ ولادك، عُزّالك ليه حابسين
أحلامك فِ الذُّل واحبابك فِ الكلابيش
يا مصر انا باحلم بالفجر بيطلع من تاني
ومساجدك تتعمَّر بالْهَدْي الرَبّاني
يرجع من بلدي يشعشع نور الإسلام
وع الدنيا يهل هلال العدل بقرآني
دي الكعبة قبالك ونسيمك من مَرجِ عْيون
دول أهلك فِ مَراكِش والغُوطة واللي فْ بَسيون
بالعربي جيرانك مِش صهْيون.. مَتقولي انا مصر!
والقدس مدينتي و جَبَلي هناك إسمه الزَيتون
وفي سِرّ يا مصر فْ قلبي مْخَبِّيه
حلم جميل من شدة خوفي عليه بَداريِه
وحشوني الأهل وأحبابي وان قلت انا راجع تاني
إياكي تِفشِي يا مصر اللي اتأمِنْتي عليه
علاء زين الدين
١٢ أبريل ٢٠٠٦
ليست هناك تعليقات:
إرسال تعليق