05 مايو 2011

دبابيس الخميس: المرثية الخَمسْية في حزب الأغلبية

 

hizb-court

المرثية الخمسية في حزب الأغلبية

يا حزب فاسد يَللا غوور من وِشِّنا

فيه ثورة قامت وبنِعلِن قرارنا بنفسنا

اللي عاشوا دايماً ينهبوا

وع الغلابة استكبروا

مالهومش عيشة النهاردة في وسطنا

 

يا حزب خايب حَكَمت دولة خربتها

إزاي هَتِنكِر وكبيركو اللي زوِّد همّها

من يوم ما حَطّ فوق عرشها

واحنا جايبين دايماً ورا

اللعبة خِلصِت فِزّ قووم من على تَلَّها

 

يا حزب ظالم سياستك كانت بلطجة

بالشوم حكمت وبالبوليس والمَفزَعة

تبِّتت حُكمَك بالحديد..

والبوكس فِكرَك الجديد

وجَت نهايتك بحُكم قاضي ومحكمة

 

يا حزب خاين إنت اللي خدمت عدونا

من كُتْر المَذلّة حاصرت غزة بإسمنا

والصهاينة إن قالوا كلمة

تقول عينية وأي خدمة

روَّح أوَامَك مطلعتش واحد مننا

 

يا حزب فاشل غِير في النفاق والأنزحة

الغش طبعك والتزوير والشَرشَحة

الشعب تعب من خلقتك

وكل مصر بتكرهك

أبواب السجن "من أجلك إنت" مفَتحَة

___

علاء زين الدين/أبريل 2011

ليست هناك تعليقات: