(كتبت هذه القصيدة منذ شهرين لمقاومة الشعور بالإحباط والغضب من مجريات انتخابات مجلس الشعب.)
آن يا بُكرة الآوان
بكرة الصُبح نِصحىَ
نِلقىَ مصر ف أحلى حال
بكرة نلقىَ الطُغمة غارت
بكرة نلقىَ الهَمّ زال
بكرة هيبقىَ شكل تاني
بكرة تبقىَ الآشية معدن
بكرة تبقى الدنيا عال
وعم مُسعَد عيشتو تِحلىَ
وسط عزبة في الجزيرة
وابنه أحمد واخته زهرة
يبنوا فيللا في الزمالك
يمشوا الجبابرة والبلطجية
ويجروا التنابلة في المسالك
ويّا الفلاسفة والغشاشين
تعود التلامذة وعم حمزة
وولاد بلدنا للحق تاني
وترجع بلادنا للطيبين
ويرجع شبابنا يحقق أماني
بكرة الغلابة ف اسكندرية
يسعوا زي ايام زمان
تنزل شباكهم في مَيّة رايقة
تطلع شباكهم بخير كتير
والبحر يضحك للحجة فايقة
وتفرح ولادهم وتاكل فطير
وبنتك وبنتي هتضحك كمان
ومصر نيلها بكرة يجري
في العصافرة وبلودان
مَيَّه تروي كل عربي
والصعايدة وابن بلدي
تسقي الحبايب في الجزاير
واللي ف حلايب والجولان
أمَّة واحدة ورب واحد
في المراكش وبورسودان
بالمودة ويد واحدة
تِعلىِّ راية الإيمان
وبكرة غزة مْنِ الأدان
تصحى تصلي الفجر بدري
وتقوم تسلم ع الجيران
وجنب كل راية حرة
في القدس ترفرف بالنهار
راية مصر هتعلىَ بكرة
ف أحلى أرض وأغلى دار
والأقصى يرجع بإيد ولادنا
وتعود جيوشنا بلِنتصار
وبكرة يبقى شكل تاني
بكرة تبقى الآشية معدن
بكرة تبقى الدنيا عال
وان قلت إمتىَ وقلت باحلم
هاقول ده بكرة ، تقوللي إثبِت
واقول ده حق بدون جدال
لما ابن مصر بهِمّة يِعزِم
ويقول يا رب عليك التُكال
عالحق يثبَت وبشدة يمسك
ويقوم بقُوِّة وعزم الرجال
يقول دي كلمة يا بُكرة واحدة :
اليوم يا بكرة آن الآوان
اليوم دا الصبح نصحى
نِلقىَ مصر ف أحلى حال
يومها نلقى الطغمة غارت
ويومها نلقى الهم زال
إيه دليلي ع كّلام ده ؟
وإيه أمارِة إنُّه بكرة ؟
أصل بعد الضَلمة نور
وبأمارِة ..
إن بعد العُسرِ يُسرا
___
علاء زين الدين/ 4 ديسمبر 2010
هناك 4 تعليقات:
جميلة يا باشمهندس. ربما في المرات القادمة نتعرف أكتر على عم مسعد و عم صابر و عم جبر، و كلام عن المكر بمصر، و شبابها و مواردها و مستقبلها و العصر، و عن الوطنية الحقيقية أو القبر، و عن الحاكم اللي عايش برة القصر، و عن شباب مصر بيصنع نصر، و الجيش بيرفض أمر و ينحاز لأيام الصبر. علاء المغربي
بصفتى واحد من أن صار ( بقلقلة النون والصاد وكلاهما ليس من حروف القلقلة ) الدعوة السلفية اعثرض على هذه القصيدة فهى لا تنبع من مشاعر سلفية ولا تمضى فى مسار ( مسار أى تراك بالانكليزية ) سلفى ولا تصب فى هدف سلفى فهى رقيقة اللفظ ونقية الغرض ونبيلة الهدف ، فإما أن تختار ألفاظ غليظة ومشاعر جامدة وأهداف غير مفهومة واما أن نعلنك من الصابئين
وأخيرا مرحبا بك فى عالم الكاجوال
طبعا انت عارف مين بيكلمك
أشكرك على التعليق أخي علاء المغربي. لاحظت أن تعليقك جاء قبل إخلاء الحاكم للقصر بيوم. ونسأل الله أن يكون القادم أجمل.
السلام عليك يا غير معرف. إن كنت تشير بطرف خفي إلى أني سلفي، فهذا إن صح يشرفني. أشكرك.
إرسال تعليق